လူဦးရေသိပ်သည်းမှု အများဆုံးဖြစ်တဲ့ ရန်ကုန်မှာနေထိုင်တဲ့ လူဦးရေ ကျပ်တည်းမှုကို
ဖြေရှင်းဖို့ အတွက် ရန်ကုန်မြို့သစ်ဧရိယာ
မြေဧကသုံးသောင်း တိုးချဲ့မှာဖြစ်တယ်လို့
သိရပါတယ်။
တိုးချဲ့မယ့်မြေဧကသုံးသောင်းကတော့ ပန်းလှိုင်မြစ်နဲ့ တွံတေးတူးမြောင်းကြား မြေနေရာ၊ လှိုင်မြစ်နဲ့ လှိုင်သာယာမြို့နယ်ကြား မြေနေရာတွေ ဖြစ်တယ်လို့ တိုင်းဒေသကြီးဝန်ကြီးချုပ် ဦးမြင့်ဆွေက ဆိုပါတယ်။
ခုလို မြို့သစ်တိုးချဲ့ဖို့ အတွက် ကျပ်ဘီလီယံ ခုနစ်ထောင် အသုံးပြုမှာဖြစ်ပြီး စီမံကိန်း အကောင်အထည်ဖော်ဖို့ အတွက် မြန်မာ့စေတနာ အများပိုင်ကုမ္ပဏီနဲ့ စာချုပ်ချုပ်ဆိုထားတယ် လို့လည်း သိရပါတယ်။
ရန်ကုန်တိုင်းဒေသကြီး လွှတ်တော်ကိုယ်စားလှယ် ဒေါက်တာညိုညိုသင်းက “အခုဟာက အစိုးရတစ်ခုတည်းပဲ သိတဲ့ စီမံကိန်း ဖြစ်နေတယ်။ နောက်ပြီး ကုမ္ပဏီတစ်ခုတည်းကိုပဲ လုပ်ပိုင်ခွင့် ပေးလိုက်တာ၊ အဲဒါတွေကို ဘာတစ်ခုမှ လွှတ်တော်က မသိရဘူး၊ အားလုံးလုပ်ပြီးမှ သိရတယ်၊ နောက်ပြီး ဒီဘီလီယံနဲ့ချီပြီး အကုန်အကျခံတဲ့ စီမံကိန်းတွေက ဆင်းရဲသား ပြည်သူတွေကိုဘယ်လောက် အကျိုးပြုနေသလဲ ပြန်ဆန်းစစ်သင့်ပါတယ်” လို့ဆိုပါတယ်။
စီမံကိန်းပြီးရင် တန်ဖိုးနည်းအိမ်ရာ အခန်းပေါင်း နှစ်သောင်း၊ ကျောင်းနှစ်ကျောင်း၊ ဘိုးဘွားရိပ်သာ နှစ်ခုနဲ့ အခွန်ကင်းလွတ်စွာ ဖြတ်သန်းနိုင်မယ့် မြစ်ကူးတံတား ငါးစင်းကို ကုမ္ပဏီက နိုင်ငံတော်ကို ပေးလှူရမှာဖြစ်ပြီး မြို့သစ်စီမံကိန်း အရ လယ်ယာမြေ နစ်နာမှုတွေကိုလည်း ဒီကုမ္ပဏီကပဲ ဖြေရှင်းရမယ်လို့ စာချုပ်မှာ သဘောတူ ထားတယ်လို့လည်း သိရပါတယ်။
The Voice Weekly
0 comments